डिपिनेटको १७औँ साधारणसभाबाट अधिकारीको अध्यक्षतामा नयाँ कार्यसमिति चयन
काठमाडौं । प्रकोप पूर्वतयारी सञ्जाल, नेपाल (डिजास्टर प्रिपेयर्डनेस नेटवर्क नेपाल– डिपिनेट) को १७ औँ वार्षिक साधारणसभाले बसन्त राज अधिकारीको अध्यक्षतामा नयाँ कार्यसमिति चयन गरेको छ।
साधारणसभापछि बसेको प्रारम्भिक बैठकले पद निर्धारण गर्दै संस्थाको प्रादेशिक संरचनालाई थप सशक्त बनाउने निर्णयसमेत गरेको छ। नवगठित कार्यसमितिमा अध्यक्षमा विपद् अध्ययन केन्द्रसँग आबद्ध बसन्त राज अधिकारी चयन भएका छन्। महासचिवमा सुरज गौतम, उपमहासचिवमा हर्षमान महर्जन तथा कोषाध्यक्षमा अमिका राजथला चयन भएका छन्। यस्तै, उपाध्यक्षमा केशवदत्त भट्ट चयन भएका छन्।
कार्यसमितिका सदस्यहरूमा कल्पना रावल बोगटी, ईश्वर दत्त उपाध्याय, शिवराम गौतम तथा श्यामबाबु कट्टेल रहेका छन्। साथै, अन्तर्राष्ट्रिय गैरसरकारी संस्थाको तर्फबाट दुई जना सदस्य रहने व्यवस्था गरिएको छ।
साधारणसभाले डिपिनेटको संगठनात्मक सुदृढीकरण, प्रादेशिक कमिटीको भूमिकालाई प्रभावकारी बनाउँदै स्थानीय तहसम्म विपद् जोखिम न्यूनीकरण र पूर्वतयारीका गतिविधि विस्तार गर्ने नीतिगत निर्णयहरू पनि गरेको छ। नयाँ कार्यसमितिले सरकारी निकाय, गैरसरकारी संस्था तथा सरोकारवालासँगको सहकार्यलाई थप मजबुत बनाउँदै समुदायस्तरमा विपद् पूर्वतयारी र क्षमता विकासका कार्यक्रमलाई प्राथमिकताका साथ अघि बढाउने जनाएको छ।
प्रतिकृया दिनुहोस