• शुक्रबार १२-१६-२०८०/Friday 03-29-2024
राजनीति

कानुनमन्त्रीमार्फत ओलीले पठाए देउवालाई कडा सन्देश

काठमाडौं । नेकपा एमालेका अध्यक्ष केपी शर्मा ओलीले सरकारले एमाले फुटाउने षड्यन्त्रका साथ ल्याएको अध्यादेश फिर्ता गर्नु असंवैधानिक, षड्यन्त्रपूर्ण र बदनियतपूर्ण रहेको बताएका छन् ।

 

प्रधानमन्त्री शेरबहादुर देउवाको दूतका रुपमा ओलीलाई भेट्न बालकोट पुगेका कानुनमन्त्री ज्ञानेन्द्रबहादुर कार्कीसँग ओलीले चलिरहेको संसद् मध्यरातमा हठात् बन्द गरेर बिहानै अध्यादेश ल्याउने काम प्रमुख प्रतिपक्षी दलका विरुद्धको षड्यन्त्र र संविधान विपरीत रहेको र अहिले फिर्ता लिनु त्यो भन्दा पनि बढी षड्यन्त्रपूर्ण रहेको बताएका हुन् । 

 

संसद् चालु रहेका बेला कानुन निर्माण, परिवर्तन वा खारेजीजस्ता कुरा संसद् बाहेक अन्यत्रबाट हुन नसक्ने ओलीको दाबी छ । सरकारले गएको भदौ २ गते दल फुटाउन सहज हुने व्यवस्था सहित जारी गरेको अध्यादेश (हिजो) सोमबार ११ गते फिर्ता गरेको छ । अध्यक्ष केपी शर्मा ओलीले कानुन मन्त्री कार्की मार्फत एमालेको गम्भीर आपत्ति र विरोध रहेको सन्देश प्रधानमन्त्री समक्ष पठाएका छन् ।

 

प्रधानमन्त्री देउवालाई एमाले अध्यक्ष ओलीले पठाएको विरोधको सन्देशबारे उनको प्रेस संयोजक रामशरण बजगाईँले लेखेका छन्, ‘सरकारले पार्टी फुटाउने प्रयोजनका लागि गएको भदौ २ गते जारी गरेको अध्यादेश सोमबार असोज ११ गते फिर्ता गरेको सूचना जारी गरायो । जुन विल्कुलै असंवैधानिक, षड्यन्त्रपूर्ण र बदनियतपूर्ण रहेको पुष्टि भएको छ ।

 

संसद्को अधिवेशन चालु नरहेको अवस्थामा तत्काल देशलाई आवश्यक परेको अवस्थामा मात्र सम्माननीय राष्ट्रपतिज्यूबाट अध्यादेश मार्फत कानुन सम्बन्धी काम हुन सक्ने हो । तर अहिले संसद् अधिवेशन चालु रहेकै बेला संसदमा प्रस्तुत विधेयकको वास्ता नगरि, संसद्को मानमर्दन गर्दै जारी गरिएको अध्यादेश खारेजीको सूचना असंवैधानिक, गैरकानुनी र दूषित मनसायबाट अभिप्रेरित, दलीय व्यवस्था र प्रमुख प्रतिपक्षी दल विरुद्ध लक्षित छ भन्ने कुरा प्रष्ट छ ।

प्रतिकृया दिनुहोस
सम्बन्धित समाचार