• बिहीबार १२-१५-२०८०/Thursday 03-28-2024
डबली

निर्मलकुमार रिमालका एघार ताङ्का

१. 
इतिहासको 
पाना छ भरिएको 
रक्त र पित्त
वेदनाको कहानी
दोहोरिएर सँधै । 

 

२. 
विचार वेग
उदाएको छ ममा
सहज छैन
सो गहिराई बुझ्न
सितिमिति ढङ्गले । 

 

३. 
गाँजिरहेछ
विश्वलाई द्वन्द्वले
नहटेसम्म 
विभेद मनबाट
रोकिँदैन बवाल । 

 

४.
कवि श्रष्टा हो
गर्छ सिर्जना सँधै
रमण गर्छ
आफ्नै संसारमा ऊ
विशुद्ध विचार लिई । 

 

५. 
पर्दा पछाडि
भइरहेछ खेल
अनभिज्ञ छ 
मानिस यसबारे
आफ्नै काम धन्दाले । 

 

६. 
कुनाकुनामा
पनि पर्छ बढार्न
फोहोरलाई 
त्यस्तै हो मन पनि
धुनुपर्छ सदा । 

 

७. 
सकिन्छ नाप्न 
समयको रफ्तार ?
अन्धो विज्ञानले
गरी चमत्कार
झन् पो बढ्यो पाप । 

 

८. 
शीतको थोपा 
आवरण भोरको
सुशाशित छ
यो धराको सचित्र
पार्छ सदा मोहित । 

 

९. 
सीमित भई बाँच्न
म त चाहन्नँ
आकाशजस्तै 
उदाङ्ग र उदात्त
भएर बाँच्न सकूँ । 

 

१०.
रातमा पनि 
निन्द्रा छैन मलाई 
पीरले मलाई 
हो शरिर सुकेको
छैन मनमा शान्ति । 

 

११. 
युधिष्ठिरले
हारेको झोँकमा 
जुवामा
राखे द्रौपदीलाई दाउमा
हार्नुपर्‍यो द्रौपदीले ।

 

(दिवङ्गत रिमालले आयुर्वेदीय औषधि उत्पादनमा लामो समय बिताए । तर, साहित्यसँग उनको समीपको सम्बन्ध रह्यो । उनका डेढ दर्जन साहित्यिक कृतिहरु प्रकाशित छन् । –सम्पादक)

प्रतिकृया दिनुहोस
सम्बन्धित समाचार