• बिहीबार १२-१५-२०८०/Thursday 03-28-2024
डबली

थुम्को

एकातिर फुस्रे

नयाँ नाम मन्दाकिनी

अलि काली छिन, अनि अलि पर

अर्कोतिर सेती

धेरै सेती छिन्, धेरै नजिक

बीचमा थुम्को

त्यहाँ लमतन्न सुतेको म

अनि क्रमश : उक्लिदै गएका

दुबैतिर होचा पहाडहरु

रुखले ढाकिएका – हरिया, सुन्दर

यस्तै पहाडका पत्रहरुपछि

हिमश्रृङ्खला अन्नपूर्णको

बीचमा माछापुच्छ्रे

म लमतन्न परेर सुतेको छु

केही शान्ति पाउँन

धेरै कुरो बिर्सन

बिर्सदा मिठो अनुभूति गर्दछु

बिर्सदा जहाँ छु त्यही सीमित हुन्छु

अहिले थुम्कोमा

छ फिट भन्दा कममा सीमित छु

लक्ष छैन, न आकांक्षा

न शक्ति, न मुक्ति

मनदागिनीको झिनो आवाज

नसुनिने भएको छ

अलि पर दोविल्लामा 

सेतीसँग सहवास हुन्छ उनको

सेतीको गन्तव्य छ

प्रवाह छ

अनवरतको ध्वनी छ

लमतन्न सुतेको म

त्यस ध्वनीभित्र समाहित हुनसके

कस्तो होला ?

त्यो ध्वनी सुनिरहँदा

जसले केही भनेको छैन

तर मलाई केही भनेको जस्तो लाग्छ

कही यस्तो कि ?

म जुरक्क उढे

केही रिंगटा लाग्यो

वरिपरी हेर्दछु

त्यही हरिया पहाड

परकी मन्दाकिनी

वरकी सेती

बीचमा ढिङ्ग उभिएको थुम्को

त्यसमा ढिङ्ग उभिएको म


दोविल्ला, पोखरा

असोज २७, २०७०
 

प्रतिकृया दिनुहोस
सम्बन्धित समाचार