अन्तर्राष्ट्रिय लोक सांस्कृतिक मेला आयोजना हुने
काठमाडौं । अन्तर्राष्ट्रिय लोक सांस्कृतिक मेला नेपालका विभिन्न शहरमा आयोजना हुने भएको छ । एभरेष्ट नेपाल कल्चरल ग्रुपले काठमाडौंको कान्तिपथस्थित येलो पेगोडा होटलमा बिहिबार पत्रकार सम्मेलन आयोजना गरी ‘पर्यटक कलाकारको स्वागत सत्कार, नेपाली लोक संस्कृतिको आधार’ भन्ने नारासहित दशौं अन्तर्राष्ट्रिय लोक सांस्कृतिक मेला यही फाल्गुण १६ देखि २५ गतेसम्म नेपालका विभिन्न शहरमा आयोजना गरिने जानकारी गराएको हो ।
कल्चरल ग्रुपमा अध्यक्ष तथा दशौं अन्तर्राष्ट्रिय लोक सांस्कृतिक मेलाका संयोजक रामचन्द्र कोइरालाले निजी क्षेत्रले यति ठूलो कार्यक्रम गर्दैगर्दा पनि सरोकारवाला निकायले भने खासै सहयोगात्मक हात अगाडि नबढाए पनि सांस्कृतिक मेलालाई भव्य रूपमा सम्पन्न गरेर देखाउने अठोट व्यक्त गरे । ‘नवौं अन्तर्राष्ट्रिय मेला भव्य रूपमा सम्पन्न गरेको अनुभवले पनि दशौं मेला अझ भव्य रूपमा सम्पन्न गर्ने संयोजक कोइरालाले बताए ।
पत्रकार सम्मेलनमा दशौं अन्तर्राष्ट्रिय लोक सांस्कृतिक मेलामा सहभागी हुने मुलुकका सहभागीहरूले प्रस्तुत गर्ने लोक नृत्यका केही झलकहरू पनि प्रस्तुत गरिएको थियो ।
उद्घाटन कार्यक्रम नेपाल प्रज्ञा प्रतिष्ठान कमलादीको हलमा हुने यसपटकको अन्तर्राष्ट्रिय लोक साँस्कृतिक मेलामा इस्टोनिया, मेक्सिको, बङ्गलादेश, भारत, मलेसिया, डेनमार्क, इजरायल, बुल्गेरिया, श्रीलङ्का, इजिप्ट र नेपाल गरी ११ देशले सहभागिता जनाउने पनि पत्रकार सम्मेलनमा जानकारी गराइएको थियो ।
सम्बन्धित समाचार
प्रतिकृया दिनुहोस