राप्रपाले सरकारविरुद्ध देशभर आन्दोलन चर्काउने(हेर्नुहोस २२ बुँदे मागपत्र)
-अरिश्मा मोक्तान:
काठमाडौं । राष्ट्रिय प्रजातन्त्र पार्टी (राप्रपा) ले सरकार गतिविधि विरुद्ध आन्दोलनको घोष्णा गरेको छ ।
आइतबार (आज) काठमाडौंमा पत्रकार सम्मेलनको आयोजना गर्दै आन्दोलनका कार्यक्रमहरु घोषणा गरेको हो ।
राष्ट्रिय प्रजातन्त्र पार्टीले हिन्दु पुर्नस्थापना लगायतका विभिन्न मागहरु राखेर आगामी फाल्गुन ७ गते प्रजातन्त्रको दिवसको दिनबाट देशव्यापी जनसंघर्ष गर्ने घोषण गरेको हो ।
राप्रपाका अध्यक्ष कमल थापाले पत्रकार सम्मेलनमा फागन ७ गतेका दिन प्रधानमन्त्रीलाई २२ बुंदे मागपत्र बुझाएर आन्दोलनको सुरुवात गर्ने गरे ।
सोही दिन ७४ जिल्लाका प्रमुख जिल्ला अधिकारी(सिडिओ), सातै प्रदेशका मुख्यमन्त्रीलाई ज्ञापन पत्र बुझाइने अध्यक्ष थापाले बताए ।
राप्रपको माग सम्बोधनका लागि फागुन मसान्तसम्म सरकारबाट प्रतिउत्तरको प्रतिक्षा गर्ने पनि अध्यक्ष थापाले बताए । फागुन मसान्त सम्ममा पनि माग सम्बोधन नभए देशव्यापी रुपमा जनसंघर्षको कार्यक्रम संचालन गर्ने पनि उनले बताए ।
मागपत्रमा संविधानमा रहेको धर्मनिरपेक्ष खारेज गरी हिन्दुराष्ट्र घोषणा गनुपर्ने, राजसंस्था सहित सबै राजनीतिक दल अटाउने सर्वपक्षीय गोलमेच गर्नुपर्ने, संघीयताबारे जनताको जनमत संग्रह गनुपर्ने, बेरोजगारीको समस्यालाई समाधान गर्न दीर्घकालीन कार्यक्रम गनुपर्नेलगायतका मागहरु अघि सारिएको छ ।
त्यस्तैगरी विदेशमा लुकाएको कालोधन देशभित्र ल्याउनुपर्ने, ३३ किलो सुन तस्करीलाई छानवीन गरी कारवाही गर्नुपर्ने, मेलम्ची खानेपानी आयोजना घोटालाको छानविन गरी कारवाही गर्नुपर्ने, बुढीगण्डकी ठेक्का खारेज गरेर नेपालले नै निर्माण गर्नुपर्ने, वाइडबडी विमान लगायत भ्रष्टचारको छानविन गर्नुपर्ने रहेको छ ।
जनसंघर्षलाई सफल पार्न र मागहरु पूरा गराउनका निमित्त सशक्त जनदवाब र जनमत सिर्जना गर्ने र संघर्षको निमित्त उपयुक्त माहोल तयार गर्न फाल्गुन १५ गतेबाट ३० गते सम्म मेची–महाकाली राष्ट्रिय स्वाभिमान यात्रा संचालन गर्ने अध्यक्ष थापाले पत्रकार सम्मेलनमा जानकारी दिए ।
राष्ट्रिय प्रजातन्त्र पार्टीले नेपाल सरकार समक्ष पेश गरेका मागहरु
(१) संविधानमा रहेको ‘धर्मनिरपेक्षता’खारेज गरियोस् तथा पूर्ण धार्मिक स्वतन्त्रता सहित नेपाललाई हिन्दुराष्ट्र घोषणा गरियोस् ।
(२) राजसंस्था सहित सबै राजनीतिक शक्तिहरु अटाउने नेपाली संस्करणको मौलिक प्रजातन्त्र कायम गर्न अविलम्व सर्वपक्षीय गोलमेच सम्मेलन गरियोस् ।
(३) संघीयता बारे जनताको प्रत्यक्ष अभिमत बुझ्न राष्ट्रिय जनमत संग्रह गरियोस् ।
(४) देश टुक्र्याउन चाहने विखण्डनकारी तत्वलाई कडाईका साथ नियन्त्रण गरि राष्ट्रिय अखण्डता सुदृढ तुल्याईयोस् ।
(५) संगठीत रुपमा लोभ लालच देखाएर र भ्रम सिर्जना गरेर जवर्जस्ती धर्म परिवर्तन गराउने कार्य नियन्त्रण गरियोस् तथा धर्म परिवर्तनमा संलग्न गैर सरकारी संस्थाहरुलाई बन्द गरियोस् ।
(६) वेरोजगारी समस्या समाधानको निमित्त अल्पकालिन तथा दीर्घकालिन कार्ययोजना कार्यान्वयन गरियोस् । यस क्रममाः
(क) वर्षमा कम्तिमा पाँच लाख रोजगारी सिर्जना गर्ने गरि दीर्घकालिन आर्थिक विकास योजना संचालन गरियोस् ।
(ख) कम्तिमा एक परिवार एक रोजगारी कार्यक्रम कार्यान्वन गरियोस् ।
(ग) रोजगारीको अवसर नपाएकाहरुलाई निश्चित अवधिसम्म वेरोजगार भत्ता उपलव्ध गरियोस् ।
(७) भ्रष्टाचार नियन्त्रण गर्न प्रभावकारी कदम चालियोस् । यस क्रममाः
(क) विदेशमा लुकाएर राखिएका कालोधन देशभित्र ल्याउने, जफत गर्ने, शंकास्पद व्यक्तिहरुको बैंक खाता तत्काल रोक्का गर्ने तथा यस्ता अवैध कारोवार संलग्न व्यक्तिहरुलाई कानुन बमोजिम कार्वाही गर्ने काम तदारुकताका साथ कार्यान्वयन गरियोस् ।
(ख) सर्वोच्च अदालतको आदेश अनुरुप एनसेलले तिर्नुपर्ने पुंजिगत लाभकर लगायत सबै कर असुली गरियोस् तथा करछली प्रकरणमा संलग्न सबैलाई कानुन बमोजिक कार्वाही गरियोस् ।
(ग) ३८ क्विण्टल तथा ३३ किलो सुन तस्करीको छानविन गरि दोषीलाई कार्वाही गरियोस् ।
(घ) विना प्रतिस्पर्धा बुढिगण्डकी जलविद्युत अयोजना निर्माण र सञ्चालनको लागि दिईएको ठेक्का खारेज गरि उक्त आयोजना नेपालले नै निर्माण गरियोस ।
(ङ) मेलम्ची खानेपानी आयोजनामा भएको घोटालाको छानविन गरि दोषीलाई कार्वाही गरियोस् ।
(च) नेपाल वायुसेवा निगमले खरिद गरेको वाईड बडि जहाज खरिदमा भएको अनियमितता र भ्रष्टाचारको छानविन गरि कानुन बमोजिम कार्वाही गरियोस् ।
(छ) २०४७ साल यताका उच्च पदस्थ व्यक्तिहरुको सम्पतिको छानविन गर्न न्यायिक छानवि आयोग गठन गरियोस् ।
(ज) राज्यकोषबाट सञ्चालित सबै निकाय र मन्त्रिपरिषदबाट नीतिगत निर्णयको आवरणमा हुने भ्रष्टाचार समेत अख्तियार दुरुपयोग अनुसन्धान आयोगको कार्यक्षेत्रमा समावेश गर्ने ।
(८) महंगी तथा कालोबजारी नियन्त्रण गर्न प्रभावकारी संरचना र नीति कायम गरियोस् ।
(९) गौरक्षाको प्रभावकारी कार्ययोजना संचालन गरियोस् ।
यस क्रममाः
(क) कानुनद्वारा दण्डनीय रहेको गौहत्यालाई नियन्त्रण गरियोस ।
(ख) प्रत्येक गाउँपालिका तथा नगरपालिकामा कम्तिमा एउटा गौशाला निर्माण गरियोस
(१०) हाल आरक्षणको सुविधाबाट वञ्चित रहेका तर आर्थिक रुपमा विपन्न अन्य जातीय समुहलाई समेत सबै क्षेत्रमा कम्तिमा १० प्रतिशत आरक्षण गरियोस् ।
(११) दश कक्षासम्म संस्कृत शिक्षा अनिवार्य गरियोस् ।
(१२) पौष २७ गते पृथ्वी जयन्ती र राष्ट्रिय एकता दिवस, फागुन ७ गते त्रिभुवन जयन्ती र प्रजातन्त्र दिवस राष्ट्रिय पर्वका रुपमा मनाउने तथा कृष्ण जन्माष्टमी र रामनवमीमा सार्वजनिक विदा दिईयोस ।
(१३) राष्ट्रिय राजस्वबाट तलब खाने कर्मचारी र शिक्षकहरुले पार्टीको सदस्यता लिन नपाउने व्यवस्था गरियोस् ।
(१४) सबै धर्म र सम्प्रदायका मन्दिर, मठ, गुम्वा, मस्जिद र चर्चको सञ्चालन र व्यवस्थापनमा सरकारी नियन्त्रण अन्त गरियोस् । यस क्रममा पशुपतीनाथ, लुम्बिनी र जानकी मन्दिरको सञ्चालन र व्यवस्थापनको जिम्मेवारी सम्बन्धित धर्म र सम्प्रदायका समुदायलाई तत्काल हस्तान्तरण गरियोस् ।
(१५) प्रशासन, शैक्षिक संस्था, कुटनितिक नियोग, संवैधानिक अंग जस्ता नियकायहरुलाई राजनीतिक हस्तक्षेप र प्रभावबाट मुक्त राख्ने तथा पार्टीगत आधारमा भागवण्डा, नियुक्ति, सरुवा बढुवा गर्ने कार्य अन्त गरियोस ।
(१६) छिमेकी मित्रराष्ट्र भारतसँगको सन् १९५० को शान्ति तथा मैत्री सन्धि प्रतिस्थापन गरि नयाँ सन्धी गरियोस तथा भारतसँगको खुला सिमा व्यवस्थित र नियमन गरियोस् ।
(१७) कालापानी, लिपुलेक र सुस्ता लगायतका क्षेत्रमा अतिक्रमित नेपाली भूमी फिर्ता लिन कुटनीतिक पहल गरियोस् ।
(१८) नागरिकता सम्बन्धि विवाद सधंैका लागि अन्त गर्नः
(क) प्रत्येक नेपालीले सहज र सरल ढंगबाट नागरिकता प्रमाणपत्र पाउन सक्ने व्यवस्था कायम गरियोस् ।
(ख) गैर नेपालीले समेत नेपाली नागरिकता प्रमाणपत्र लिएको सन्दर्भमा छानविन गर्न उच्चस्तरीय न्यायिक आयोग गठन गरियोस् तथा गैर नेपालीले लिएको नागरिकता खारेज गरियोस् ।
(१९) महिला विरुद्ध हुने सबै प्रकारका हिंसा र विभेद अन्त गर्न सशक्त कदम चालियोस् ।
(२०) कानुनद्वारा निषेधित सबै प्रकारका जातीय विभेद र छुवाछुत कडाईका साथ कार्यान्वयन गरियोस् तथा जातीय आधारमा मन्दिर प्रवेशमा लगाईएको भेदभावलाई हटाईयोस् ।
(२१) स्थानीय तहमा लगाएका अव्यवहारिक करहरु तथा तीन तहका सरकारबाट लगाईएका दोहरो कर तत्काल खारेज गरियोस् ।
(२२) विदेशमा रहेका नेपाली नागरिकहरुले समेत मतदान गर्न पाउने गरि आवश्यक व्यवस्था आगामी आम निर्वाचनबाट सुरु गरियोस् ।
कमल थापा
अध्यक्ष
राप्रपा
प्रतिकृया दिनुहोस