एप्पलको शेयर मूल्यमा ७५ अर्ब डलरको नोक्सानी
काठमाडौं । एप्पलले आफ्नो आम्दानी अपेक्षा गरेभन्दा कम हुने बताएपछि उसको शेयरको कुल मूल्यमा ७५ अर्ब डलरको नोक्सानी भएको छ। वाल स्ट्रीटमा बिहीवार एप्पलको शेयर मूल्य १० प्रतिशतले खस्किएको हो ।
एप्पलका प्रमुख कार्यकारी टिम कुकका अनुसार चीनमा बिक्री घटेका कारण कम्पनीको आम्दानी पनि घटेको हो । सन् २०१८ का अन्तिम तीन महिनामा एप्पलको आम्दानी ८४ अर्ब डलर मात्र हुने उनले बताएका छन् । यसअघि सो आम्दानी ८९ अर्ब डलर हुने ठानिएको थियो।
अन्य उपभोग्य सामग्रीका कम्पनीहरू जस्तै मोबाइल कम्पनी एप्पलका निम्ति पनि क्रिस्मसजस्तो चाडबाडको समय फलदायी मानिन्छ। वर्षभरिमध्ये सबभन्दा धेरै आम्दानी यही समयमा हुने ठानिन्छ। तर यसपालि त्यस्तो हुन नसकेको एप्पले बताएको छ ।
एप्पलको आईफोन मोबाइलको बिक्रीमा गिरावट आउनुलाई कम्पनीको आम्दानी घट्नुको प्रमुख कारण ठानिएको छ।
चीनमा एप्पलका सामग्री बिक्रीमा गिरावट आएको चेतावनीलगत्तै त्यसको असर अमेरिकी शेयर बजारमा परेको हो। प्रविधि कम्पनीहरूको शेयर सूचकाङ्क नाज्डाक ३.१ प्रतिशतले झर्यो।
केही समय अगाडिसम्म एप्पल अमेरिकामा सार्वजनिक शेयर खरिदबिक्री हुनेमध्ये सबभन्दा ठूलो कम्पनी थियो। तर अब उसलाई अन्य तीन कम्पनीले उछिनिसके।
अब एप्पलभन्दा अगाडि माइक्रोसफ्ट, एमेजन र गुगलको स्वामित्व भएको अल्फाबेट कम्पनी रहेका छन्। तर पछिल्लो समय एप्पललाई आफ्ना सामग्रीको बिक्रीमा कमी आउने अनुमान पहिलै थियो। त्यसैले उसले अन्य क्षेत्रमा पनि अगाडि बढ्ने प्रयास गरिरहेको छ।
अचेल एप्पलले सेवा, स्वास्थ्य तथा फिट्नेस क्षेत्रमा निकै प्रगति गरेको छ। एप्पलले सेवा क्षेत्रबाट उति नै कमाउँछ जति फेसबुकको कुल आम्दानी छ। बीबीसीबाट ।
सम्बन्धित समाचार
प्रतिकृया दिनुहोस